បង្អក​​ស្រា​​ឪ​​ឱ្យ​​ស្រវឹង រំលោភ​​កូន​​ស្រី

ថ្ងៃទី​ 12 ខែកញ្ញា ឆ្នាំ2013, ម៉ោង 05:23 AM ដោយ៖ ចាន់ សុខលន់

ជនជាប់ចោទហុង គីមសត់ ពេលត្រូវចាប់ខ្លួន, កុមារីរងគ្រោះស.ស, កុមារីរងគ្រោះស.ស បង្ហាញកន្លែងជនល្មើសចាប់រំលោភ, អ្នកស្រីរ៉ត ភូមរ៉ា, លោកអិុត សំអាត, អ្នកស្រីរឿន សំបូរ និងលោកកែវ បិន (រូបតូចខាងស្តាំ)

ពាក្យ​ចាស់​ពោល​ថា “ឈើ​កោង​វល្លិ​ព័ទ្ធ មនុស្ស​ខ្ចាត់​ព្រ​ម​តែ​មាន​ចិត្ត​ធម៌ ក៏​បាន​រាប់​អាន​បុរស​ពោះ​ម៉ាយ​ម្នាក់ ដែល​រសាត់​អណ្តែត​គ្មាន​គោល​ដៅ ព្រោះ​ត្រូវ​ម្តាយ​កាត់​កាល់​ចោល ឱ្យ​ចេញ​ចូល​ដេក​ស៊ី​ក្នុង​ផ្ទះ។ ទី​បំផុត បុរស​ខ្ចាត់​ព្រាត់​នោះ ក៏​ប្រើ ល្បិច​យក​ស្រា​មក​បង្អក​បុរស​ជា​ឪពុក​ឱ្យ​ស្រវឹង រួច​ចាប់​រំលោភ​កូន​ស្រី...។

ថ្មីៗនេះ មានករណីរំលោភសេព​សន្ថវៈទៅលើ ក្មេងស្រីម្នាក់ បាន​កើតឡើងនៅក្នុងភូមិបុស្សទន្លាប់ ឃុំ ចំណោម ស្រុកមង្គលបុរី ខេត្តបន្ទាយមានជ័យ ដោយ បុរសពោះម៉ាយម្នាក់ ដាច់ចំណីយូរជូរមាត់ បាន​ចាប់រំលោភក្មេងស្រីម្នាក់ រហូតបានសម្រេច ដល់ទៅ៣ដង។ ចុងក្រោយ​ត្រូវ​បាន​ក្មេង​ស្រី​រត់​ទៅ​ប្តឹង ទើបបែកការណ៍ ត្រូវសមត្ថកិច្ចមូលដ្ឋាន ចាប់ខ្លួនបញ្ជូនមកកាន់សាលា ដំបូងខេត្ត ដើម្បី​ចាត់ការ​ទៅ​តាមផ្លូវច្បាប់។

អ្នកស្រីរឿន សំបូរ អាយុ៥០ឆ្នាំ ជាម្តាយក្មេងស្រី រងគ្រោះ ដែលត្រូវបុរសពោះម៉ាយរំលោភ បាន​រៀប​​រាប់ប្រាប់ទាំងឈឺចាប់ថា គាត់បានរៀបការជាមួយប្តី ឈ្មោះកែវ បិន សព្វថ្ងៃ អាយុ៥១ឆ្នាំ អស់​រយៈ​ពេល ២៥ឆ្នាំមកហើយ ដោយបង្កើតកូនបាន៦នាក់ (ប្រុស២ ស្រី៤) ឯកូនស្រីដែលរងគ្រោះ មាន​ឈ្មោះស.ស អាយុ ១៤ឆ្នាំ ជាកូន​ទី៣។ នៅក្នុងផ្ទះ មានតែកូនស្រីម្នាក់ នេះទេ ដែល​ធំល្មម​អាច​​មើលថែប្អូនៗបាន ព្រោះគាត់មានជំងឺប្រចាំកាយ មិនសូវបាននៅផ្ទះជាប់លាប់ទេ ដោយ​ខំស្វះស្វែង​ដើរ​រក​គ្រូ​ខ្មែរព្យាបាលជំងឺ ដែលរ៉ាំរ៉ៃ អស់ជាច្រើនឆ្នាំមកហើយ ម៉្យាង​ក៏​សម្អាង​លើ​ប្តី​ជា​អ្នក​មើលថែកូនៗដែរ ប៉ុន្តែ ដឹងអី! បែរជាប្តីប្រមឹកស្រលាញ់ ដបស្រាជាងប្រពន្ធកូន ទើបផ្តល់ឱកាស​ឱ្យ​ជន​កំហូច ឆ្លៀតយកស្រាមកបង្អកឱ្យស្រវឹង រួចចាប់រំលោភកូនស្រីទៅវិញ។

អ្នកស្រីបន្តថា ប្តីគាត់បានជួយយកអាសាបុរស ពោះម៉ាយ ២ភ្លើងម្នាក់នេះ ឈ្មោះហុង គីមសត់ អាយុ​៣៥ ឆ្នាំ ជាអ្នកភូមិជាមួយគ្នា ដែលត្រូវបានម្តាយកាត់កាល់ លែង​រាប់រក ក៏ត្រូវប្តី​គាត់​អាណិត​ហុច​បាយហុចទឹក និងអនុញ្ញាតឱ្យចេញចូលផ្ទះ ដោយស្រលាញ់ទុកដូចជាកូនម្នាក់ដែរ តែបែរ​ជា​ឆ្លៀត​ពេល​គាត់មិននៅរវល់ទៅមើលជំងឺ បុរសពោះម៉ាយខ្ចាត់ព្រាត់នោះ ក៏យកស្រាមក វាត​វង់​ផឹក​ជា​មួយ​ប្តី​គាត់​ឱ្យស្រវឹង រួចចាប់រំលោភកូនស្រីគាត់ បានសម្រេចដល់ទៅ៣ដង។ បន្ទាប់មក កូនស្រី គាត់ទ្រាំ​មិន​​បាន​ក៏រត់មកប្តឹង ទើបសមត្ថកិច្ចចាប់បុរស កំហូចនោះ យកទៅញាត់ទ្រុងដែក។

លោកកែវ បិន អាយុ៥១ឆ្នាំ ជាឪពុកក្មេងស្រី រងគ្រោះ បានឱ្យដឹងថា ជនសង្ស័យ​នេះជា​មនុស្ស​កំហូច​ ដែលត្រូវបានប្រពន្ធ២នាក់ រត់ចោល ព្រោះតែទ្រាំមិនបាន ហើយ​ធ្លាប់ដុត​ផ្ទះម្តាយខ្លួន​ឯងចោល។ មិនតែប៉ុណ្ណោះ គ្រាន់តែគេចូលមករស់នៅភូមិនេះភ្លាម ធ្វើឱ្យអ្នកស្រុកបាត់អស់មាន់ទា សូម្បីដំណាំក៏មិនសល់ដែរ។ ដំបូងឡើយ លោក​មិនប្រកាន់អ្វីទេ ដោយឃើញបងប្អូន និងម្តាយ​របស់​គេ​ លែងរាប់រក ក៏អាណិតហុចបាយ ហុចទឹកយកតែបុណ្យទៅ ម៉្យាងដោយនឹកឃើញពាក្យ ចាស់ថា “ឈើ​កោង​ធ្វើកង់ ឈើត្រង់ធ្វើកាំ” ហេតុនេះ ត្រឹមបាយទឹកបន្តិចបន្តួច ចាត់ទុកថា ជួយយកអាសា មនុស្ស​ក្នុងគ្រាលំបាកទៅចុះ។

លោកកែវ បិន បន្តថា ពេលនេះ ស្រាប់តែគេបែរជាហ៊ានយកស្រាមកបង្អកលោក រួចចាប់​រំលោភ​កូនស្រី រហូតដល់ទៅ៣ដង ទើបដឹង។ លោកមានកំហុសធ្ងន់ណាស់ មិនគួរយក​អាសាមនុស្ស​ពាល​យ៉ាងនេះទេ។

អ្នកស្រីរ៉ត ភូមរ៉ា អាយុ៤៣ឆ្នាំ ជាអនុប្រធាន ភូមិ និងជាក្រុមទ្រទ្រង់បណ្តាញសុខភាពភូមិ បានប្រាប់ ថា នៅថ្ងៃកើតហេតុនោះ ក្មេងស្រីរងគ្រោះបានរត់មក ផ្ទះអ្នកស្រី ទាំងត្រហេបក្រហបប្រាប់ថា បុរស​កំហូច ឈ្មោះហុង គឹមសត់ បានចាប់រំលោភនាងរហូតដល់ ទៅ៣ដងរួចមកហើយ។ លើកទី១ ខណៈដែលម្តាយ នាងរវល់ទៅស៊ី​ឈ្នួល​ច្រូតស្រូវឱ្យគេ ពេលនោះ ជនសង្ស័យ បានចាប់រំលោភ​នាង​នៅ​លើផ្ទះ រហូតបានសម្រេច រួចគំរាមសម្លាប់ទៀតផង។ លុះលើកក្រោយៗ ពេលម្តាយនាង​រវល់​ទៅព្យាបាលជំងឺ ជនកំហូចនេះ បានទៅទិញស្រាមកផឹកជាមួយឪពុកនាងឱ្យស្រវឹងដាប ទើប​គេ​ចូល​ចាប់នាងរំលោភ។ លុះលើកចុងក្រោយ គេបានប្រើល្បិច​លួង​លោមនាង មករំលោភនៅក្នុងចម្ការចេក ចម្ងាយ២គីឡូម៉ែត្រ ពីផ្ទះនាង។ ក្រោយពីទទួលបានដំណឹងនេះភ្លាម អ្នកស្រីក៏រាយការណ៍ទៅ សមត្ថកិច្ច រួចចុះធ្វើការ​ឃាត់ខ្លួនតែម្តង។

លោក អ៊ិត សំអាត នាយប៉ុស្តិ៍នគរបាលរដ្ឋបាល ឃុំចំណោម បានឱ្យដឹងថា ដោយមានពាក្យ​បណ្តឹង​ពី ក្មេងស្រីរងគ្រោះ ទើបលោកបានចុះឃាត់ខ្លួនជនសង្ស័យ ឈ្មោះ​ហុង គឹមសត់ អាយុ៣៥ឆ្នាំ ពីបទ​រំលោភសេពសន្ថវៈលើអនីតិជន រួចក៏បានរៀបចំសំណុំរឿងបញ្ជូនខ្លួន ជនសង្ស័យ​ទៅសាលា​ដំបូង​ខេត្ត ដើម្បីចាត់ការបន្ត។

អ្នកស្រីសុខ រើន អាយុ៦៥ឆ្នាំ ជាម្តាយជនសង្ស័យ បានឱ្យដឹងថា កន្លងមក កូនប្រុសនេះ ធ្លាប់រត់​ចោល​គាត់ ដោយនាំទាំងកូនម្នាក់ទៅជាមួយផង។ ដោយ​ឃើញ​តែលតោលអាណិតពេក គាត់ក៏នាំ​ទៅ​ចាប់ដី នៅខេត្តឧត្តរមានជ័យ បាន៤ហិកតារ ដើម្បីធ្វើស្រែចម្ការ។ តែដោយវក់នឹងរឿងស្រាខ្លាំងពេក ថ្ងៃមួយ កូនអប្រិយនេះ ក៏បានដុតផ្ទះ ដែលសង់សម្រាប់ដេកចាំចម្ការនោះ ឆេះខ្ទេចអស់ រួចគេមក​រស់​នៅស្រុកមង្គលបុរី នេះ ដោយអុកឡុកលួចមាន់ទាអ្នកស្រុក ស្ទើរអស់ ហើយសូម្បី​តែផ្ទះដែល​គាត់​រស់នៅសព្វថ្ងៃ ក៏កូនប្រុសលួចគាស់ក្តារ យកទៅលក់ទិញស្រាផឹក ដែរ។ គាត់ក៏កាត់កាល់​លែង​រាប់​រក ស្រាប់តែក្រោយ មកឮដំណឹងថា ប៉ូលិសចាប់ ព្រោះរំលោភក្មេងស្រី មិនទាន់គ្រប់អាយុ​ទៅវិញ​ ប៉ុន្តែ អ្នកស្រីហាក់បានធូរចិត្តបន្តិច ពេលដែលប៉ូលិសបានចាប់កូនអកតញ្ញូម្នាក់ នេះដាក់គុក ព្រោះដូចបានដក​បន្លា​ពី​ទ្រូង​អ៊ីចឹង ហើយ សង្ឃឹមថា ពេលចេញពីគុកមកវិញ គេនឹងចេះកែខ្លួន ធ្វើជាមនុស្សត្រឹមត្រូវវិញមិនខាន ៕